O presidente da Xunta e do PP en Galiza, Alberto Núñez Feixoo, presentouse este sábado como un candidato "libre" para optar á reelección nos comicios autonómicos do próximo 5 de abril e advertiu: "Non serei refén de ningún partido, nin tan sequera do meu, porque son servidor de todos os galegos".
Fronte a un Auditorio Mar de Vigo con numeroso público presente para a súa proclamación oficial como candidato polo PP, Feixoo reivindicouse como "un candidato libre" que aspira a "volver ser un presidente libre" con obrigas "só cos galegos, nada máis".
Arrancamos o acto de proclamación de @FeijooGalicia como candidato á presidencia da Xunta, é facémolo presentando un lema que resume a nosa consideración desta terra marabillosa e exemplar. #GaliciaéMoito #FeijóoPresidente pic.twitter.com/hq86WgyKW9
— PP de Galicia (@ppdegalicia) February 15, 2020
Tras días de apelacións directas desde a xestora de Ciudadanos para concorrer aos comicios de forma conxunta, o líder dos populares galegos descartou dirixir "ningún bloque de partidos". Así, co compromiso de "dar estabilidade" e "representar o entendemento" entre a cidadanía galega, situou en fronte unha oposición "multipartita" que fomenta a "división".
Con este multitudinario acto na entrada do Auditorio Mar de Vigo, onde tamén interviñeron a delegada da Xunta na cidade, Corina Porro, e o líder do PP de Pontevedra, Alfonso Rueda, Feixoo lanzou a súa precampaña baixo a máxima de "Galicia é moito. Galicia é todo".