En comparecencia de imprensa Xavier Vence explicou o calendario e os eixos centrais que compoñen o relatorio da XV asemblea nacional do BNG cuxo lema será, avanzou, Autoorganización, autogoberno e autodeterminación.
Neste senso, o portavoz nacional do BNG asegurou que será “a militancia quen vai decidir co seu voto o futuro do proxecto nacionalista que encarna o BNG” através do seu voto “individual”. Aliás, acrecentou, serán as persoas filiadas á organización frontista as que determinen “o alcance, profundidade e o ritmo” do proceso de “refundación”.
Destarte, os eixos arredor dos que xirará o debate serán a reforma organizativa, a renovación e posta ao día do discurso e o propio calendario do proceso. Estes asuntos fan parte do relatorio aprobado polo Consello Nacional do Bloque xunto cos votos particulares formulados por algunha das persoas que integran o máximo órgao entre asembleas do BNG.
O lema da asemblea será Autoorganización, autogoberno e autodeterminación
A respeito do ritmo a militancia do BNG deberá determinar, sinalou Vence, se o proceso de refundación “debe facerse ao longo dun ano ou concluír antes do verán tendo en conta as eleccións autonómicas”.
“Todos e todas temos o convencemento de que Galiza precisa un proxecto nacionalista precisa mudanzas”, dixo Vence.
Até a asemblea nacional que terá lugar o 28 de febreiro no Palexco da Coruña as persoas que desexen participar deberán inscribirse antes do 15 de febreiro. Aliás, as candidaturas para a escolla dos órgaos de dirección da organización frontista remata o 22 de febreiro.