mércores 08/12/21

A futura alcaldesa de Ribadavia resulta vítima dunha campaña machista

Unha imaxe da política socialista, simulando unha portada da revista Interviú, circula polas redes sociais. Noelia Rodríguez vén de presentar unha moción de censura contra o Goberno local do PP da man de Ribeiro en Común. Agás sorpresa, será a primeira alcaldesa da localidade.
A deputada Marina Ortega con Noelia Rodríguez. (Foto: PSdeG-PSOE)
Noelia Rodríguez coa deputada Marina Ortega. (Foto: PSdeG-PSOE)

A líder do PSOE de Ribadavia e virtual alcaldesa da localidade após a presentación dunha moción de censura, Noelia Rodríguez, foi vítima nas últimas horas dunha "campaña machista" a través das redes sociais. Numerosas foron as persoas que amosaron seu apoio á política socialista, que topou cunha imaxe persoal manipulada para facer unha montaxe que simula a capa da antiga revista Interviú.

A distribución desta fotografía, cuxa orixe non transcendeu, coincide co ascenso practicamente feito até a Alcaldía de Ribadavia. O PSOE e Ribeiro en Común sumaron as súas sete concelleiras esta semana para presentar unha moción de censura contra o Executivo municipal do PP, que dirixe a vila en minoría.

Por iso, o previsíbel é que Noelia Rodríguez sexa a próxima en ter o bastón de mando. No entanto, o pleno será a final de mes.

Ademais será a primeira rexedora acompañada na tenencia de Alcaldía por Paula Rodríguez, de Ribeiro en Común. Pero esta nova aparece acompañada da campaña que onte denunciou a portavoz do PSOE no Congreso, Adriana Lastra, que condenou os feitos e amosou o seu apoio á compañeira.

Na mesma liña manifestáronse outros cargos do PSdeG como a deputada autonómica Marina Ortega. "Todo o meu apoio e recoñecemento á nosa compañeira @NoelinhaNoe, próxima alcaldesa de #Ribadavia, que está a ser vítima dunha campaña asquerosa e machista. Ánimo Noelia!", indicou Ortega a través da plataforma Twitter. .

Ademais, nun comunicado enviado aos medios denunciou o "intolerábel ataque machista e vexatorio" contra a "primeira muller que vai ser alcaldesa de Ribadavia". Igualmente pediu ao Partido Popular, que perderá o poder, a que condene a campaña "para evitar calquera tipo de complicidade con estes ataques públicos".

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Ortega, que exixiu o “máximo e escrupuloso respecto” ao desenvolvemento dos cargos de responsabilidade pública por parte das mulleres, non foi a única en amosar o seu apoio a Noelia Rodríguez. De forma pública, numerosas persoas defenderon o seu bo facer e o seu futuro papel como rexedora nas redes sociais.

A última hora da tarde transcendeu que o popular César Fernández, aínda rexedor do municipio, amosou a súa repulsa pola campaña de desprestixio. O BNG tamén quixo expresar a súa solidariedade coa persoa proposta para a Alcaldía. "Non todo vale contra quen non pensa coma un. Condenamos enerxicamente todo intento de degradar a calquera persoa", incidiu o Bloque a través dun comunicado.

A futura alcaldesa de Ribadavia resulta vítima dunha campaña machista
comentarios