O secretario xeral do PSdeG, Valentín González Formoso, afirmou na cidade das Burgas que “quedan poucos días para que Ourense decida se quere ser noticia polos esperpentos” de Xácome e do PP ou “polos logros dunha das cidades máis importantes de Galiza” da man do alcaldábel socialista Francisco Rodríguez.
González Formoso apostou por “volver a soñar e recuperar o talento da xente nova e a cidadanía orgullosa da súa identidade” e asociou esta posibilidade a un Goberno local liderado polos socialistas.
Ausencia de compromiso
O líder dos socialistas comprometeu “os investimentos necesarios para que o colectivo das persoas con discapacidade teña amparo público” e denunciou a falla de compromiso con este colectivo por parte dos actuais rexedores da cidade.
O dirixente socialista asegurou que unha mudanza de política con estes sectores virá da man da súa formación “como ocorre en cada unha das 113 vilas e cidades onde hai un alcalde ou alcaldesa socialista”.
O responsábel do PSdeG denunciou a “insensibilidade” do Goberno galego coas persoas con discapacidade e puxo como exemplo disto o estado de conservación do centro Aspanas na cidade.
‘Instalacións indignas”
González Formoso criticou a desatención do Goberno galego que provoca que as “persoas con dificultades teñan que afrontar vivir día a día nunhas instalacións indignas”, impropias dunha Galiza “inmersa no proxecto europeo”.
O secretario dos socialistas instou a Xunta a empregar as axudas europeas para “destinar de forma inmediata fondos a rehabilitar este espazo”. Nesta liña, esixiu que que a discapacidade “teña atención urxente por parte do Goberno galego”
A visita do dirixente do PSdeG a Ourense enmárcase na campaña electoral de cara os comicios locais de 28 de maio, onde o os socialistas pelexan por converterse na forza máis votada en disputa cos populares.