Munición de groso calibre é a que utiliza Méndez Ferrín nun artigo intitulado Láncara, en que saúda o nacimento do think tank do mesmo nome que se acaba de criar por volta da Anova de Beiras. O veterano escritor contextualiza o aparecimento deste obradoiro de ideas -ve nel "as luces da intelixencia crítica"- nun momento en que se estaría a producir o "asalto ao poder" de En Marea por parte da "dereita galeguista", operación lanzada pola "dirección visíbel de Villares e a oculta de toupeiras históricas", unha alusión que apunta a figuras como Mario López Rico e Luís Eyre Palleiro.
"Vén Lancara cando En Maré é atacada sen trégos por todos os medios de comunicación, e outros, do réxime cuxa constitución non votamos as galegas e os galegos", escribe Méndez Ferrín, quen sitúa nesa campaña -dirixida supostamente a conseguir que o 'neorrexionalismo' sexa hexemónico na confluencia- o "intento de purga a Paula Quinteiro".
Ferrín dirixe durísimas críticas ao proceso interno aberto polo Consello da Marea -unha consulta en que tomou parte 40 por cento das persoas inscritas- á parlamentar de Podemos-Anticapitalistas. "Eu creo que tiven máis garantías procesais cando me xusgou o TOP [Tribunal de Orde Pública, unha corte de excepción durante a ditadura franquista] que Quinteiro tivo cando a dereita galeguista pretendeu apartala do parlamentiño dun cachete". "Pretendeu sen conseguilo; tamén é certo", acrecentou.
O referente histórico da FPG equipara a corrente villarista á "Dereita Galeguista de 1936" [a que se escindiu do Partido Galeguista por non apoiar a candidatura da Frente Popular] e "tamén o piñeirismo que intentou sepultar o Consello da Mocedade en 1963". O autor de Arraianos ve neste momento a cúpula da confluencia galega en mans de "galeguistas que non queren unirse de ningún xeito ás esquerdas (ás independentistas galegas e ás de dirección española)".