Feixoo: "Quero volver vivir en Madrid, un lugar próspero que ama a liberdade"

O aínda presidente da Xunta loou en Madrid a xestión de Isabel Díaz Ayuso, a quen "insultan" porque "a temen", dixo.
Alberto Núñez Feixoo sostén un cartaz cos rostros de Martínez-Almeida e Díaz Ayuso, un "tándem electoral infalíbel", dixo (Foto: Alberto Ortega / Europa Press).
photo_camera Alberto Núñez Feixoo sostén un cartaz cos rostros de Martínez-Almeida e Díaz Ayuso, un "tándem electoral infalíbel", dixo (Foto: Alberto Ortega / Europa Press).

O aínda presidente da Xunta da Galiza, Alberto Núñez Feixoo, que estes días está a percorrer o Estado español para presentar ás bases do Partido Popular (PP) a súa candidatura á Presidencia da formación, manifestou esta terza feira o seu desexo de "voltar a Madrid".

Nun acto no que tamén participou a presidenta da Comunidade de Madrid, Isabel Díaz Ayuso, Feixoo lembrou o seu pasado en Madrid —onde desenvolveu diferentes cargos como o de presidente de Correos—, "probabelmente", dixo, unha das cidades onde "máis cousas" aprendeu.

De feito, afirmou que chegou á situación actual, a piques de presidir o PP, "grazas á experiencia que obtiven nesta cidade [Madrid], xunto coa Xunta [da Galiza]".

"Volverei vivir en Madrid e comprobarei que non mudou, que Madrid é unha cidade acolledora e aberta, un lugar próspero que ama a liberdade, e por iso quero volver", expresou.

Por outra parte, Núñez Feixoo loou a xestión de Díaz Ayuso e asegurou que "se a insultan" é "porque a temen", algo que, asegurou, tamén lle acontece a el.

Tamén destacou o "tándem electoral" formado por José Luis Martínez-Almeida —alcalde de Madrid— e Ayuso, que, segundo dixo, na Galiza cren "infalíbel", ao tempo que defendeu atender a maioría dos cidadáns desde a "centralidade" e gobernar "absolutamente para todos".

E esta mesma cuarta feira, Martínez-Almeida utilizou o mesmo símil para referirse a Ayuso e Feixoo, que ao seu xuízo conforman un "tándem gañador" porque "se entenden" e teñen "boa sintonía".

Comentarios