Núñez Feixoo chama polas 'ovellas descarriadas'. Nun acto político en Vimianzo, Feixoo apelou a que a dereita “aprenda a lección” do que aconteceu nas eleccións xerais do 28 de abril coa división do voto. A seguir, o presidente do PPdeG e da Xunta chamou a “volver unir o voto de Ciudadanos e o de Vox, que foi nútil” no PP. Un partido que, afirmou, é “galeguista”, “moderado” e “reformista”.
"Cando estamos unidos somos máis útiles”, manifestou ao tempo que situaba o PP como o único partido que permite “construír o país” desde a “moderación”. Unha formación, dixo, que debe ser “un amplo proxecto” que responda a un “amplo espectro político”.
Non é a primeira vez que o presidente da Xunta fai fincapé na división do voto da dereita. Foi unha das súas teimas durante a campaña electoral das xerais, cando sinalaba que votar Cs e Vox supoñía favorecer unha vitoria socialista. Pasados os comicios, Feixoo mantén as apelacións e chamadas a que todo o abano da dereita española volva converxer no PP.
Este sábado en Vimianzo reiterou que se nas pasadas eleccións xerais non se dividira o voto da dereita, hoxe no Estado español habería outro goberno: “Cada vez que dividimos o voto convertemos un goberno en desgoberno”.