O presidente da Xunta, Alberto Núñez Feixoo, desvinculou a titularidade das residencias de maiores dos problemas derivados dos contaxios de COVID-19 que se rexistran nestes centros e asegurou que a situación é "común en toda Europa e España".
Preguntado esta terza feira polas críticas nas que o PSdeG vinculou a "privatización" destes centros por parte da Xunta á creación de "imperios xeriátricos", Feixoo rexeitou expor un "cuestionamiento da titularidade" das residencias na súa comparecencia desde San Caetano.
"O que temos que cuestionar é como se autorizan as residencias, que tipo de residencias debemos autorizar, que configuración arquitectónica teñen que ter os edificios, que plantilla e que dotación de plantilla de forma directa ou indirecta ten que ser sanitaria....", manifestou.
A Federación Galega de Asociacións de Usuarias e Familiares de Usuarias de Residencias e da Dependencia, REDE, na súa denuncia presentada na Fiscalía Superior de Galicia contra as directivas das residencias privadas do país considera que todos os problemas detectados nestas residencias obedecen a unha cuestión de "aforro" de cartos por parte das empresas xestoras, sinalando principalmente á multinacional DomusVi.
Despois de sinalar que a Xunta estuda estas cuestións "desde hai semanas", Feixoo considerou que "o mellor que se pode facer" nestes momentos é "coñecer os datos" de todas as persoas que resultaron falecidas ou contaxiadas no total de residencias de España.
Segundo indicou, o Goberno estatal ten estes datos que é necesario coñecer. "Estar a ocultar os datos de falecidos e contaxiados en residencias é algo que non podo compartir en ningún modo e, por iso, desde que tivemos información, estamos a trasladala en tempo real", xustificou.
Porén, os propios datos da Xunta da Galiza indican que o número de contaxiadas nas residencias públicas (apenas unha vintena de usuarias) é moito inferior á das privadas e concertas (900). E o mesmo acontece coas vítimas mortais, case todas ligadas ás residencias privadas.
