Despois de que onte transcendera unha acusación do ex responsábel das contas dentro do PP nacional, Luis Bárcenas, sobre a suposta destrución de documentación que demostraba o financiamento ilegal do partido por parte do ex presidente Mariano Rajoy, hoxe Núñez Feixoo saíu na defensa deste último.
Na rolda de prensa posterior ao Consello da Xunta, o seu presidente, Alberto Núñez Feixoo, asegurou: “Continúo convencido da honorabilidade en toda a súa carreira política do presidente Rajoy”.
Así respondía ás preguntas dos medios preguntado sobre o contido da misiva que Bárcenas remitiu á Fiscalía Anticorrupción e que se coñeceu cinco días antes dunha nova cita do ex tesoureiro popular coa Xustiza.
Nese escrito, o antigo cargo político -que cumpre 29 anos de prisión e aínda ten sentenzas pendentes- asegura que Mariano Rajoy destruíu papeis con anotacións dos supostos movementos “da caixa b” que se usaba para financiar o partido “sen saber” que el mantiña gardada unha copia.
Para Feixoo esta carta tan só está vinculada á “estratexia de defensa” de Bárcenas de cara ao seu xuízo pola peza que fai referencia a esa caixa secundaria.
“Non creo que deba facer comentarios sobre a estratexia de defensa desa persoa”, remarcou, se ben incidiu na súa confianza en Rajoy.
“Non teño dúbidas. O dixen así fai moito tempo e reafírmome”, concluíu, advertindo que no que se refire ao camiño seguido polos avogados de Bárcenas os seus “comentarios” non aportan demasiado.