Alberto Núñez Feixoo foi o primeiro dirixente do Partido Popular da Galiza en achegar a súa valoración sobre a intervención de Felipe VI. Nun chío colocado nas redes sociais, o mandatario galego celebrou que “de novo” o monarca dera un discurso de Nadal “exemplar”.
“Maxestade, conte con Galiza", afirmou Feixoo, quen significou “a proximidade cos españois ante a pandemia” do rei e destacou o seu “compromiso coa Constitución e os seus valores integradores”.
Feixoo cualificou a intervención de Felipe VI “de exemplaridade institucional e de confianza no país para a reconstrución” após a crise sanitaria e económica provocada pola Covid.
“O país precisa máis discursos como o de Felipe VI”
O secretario xeral dos populares galegos Miguel Tellado tampouco aforrou gabanzas as palabras do monarca. Neste sentido, cualificou “de inspiradora a intervención pronunciada” polo rei e apuntou que “o país precisa máis discursos como o de Felipe VI e menos como os que pronuncia Pedro Sánchez”.
“As verbas do monarca combinaron o optimismo e a confianza ante as potencialidades dunha gran nación como España co rexeitamento daqueles partidos que fan da confrontación un xeito de vida e mesmo de supervivencia política”, adiantou o dirixente popular.
Tellado lembrou que “durante 40 anos de democracia os Gobernos sempre estiveron ao carón da monarquía” e instou ao “Goberno en tomar nota do modelo de convivencia reivindicado por don Felipe”
“Zarzuela entende mellor a sociedade”
“Na defensa dunha sociedade que avanza unida e sen rancor estará sempre o Partido Popular da Galiza”, asegurou Tellado, quen afirmou que “Zarzuela entende mellor a sociedade e está máis preto da rúa que o Palacio da Moncloa”.
Os populares destacaron a sensibilidade social da intervención de Felipe VI e significaron que “a Coroa estea máis sensibilizada con esta cuestión que un suposto Goberno de progreso debería facer reflexionar aos ministros de PSOE e de Podemos”.
“As verbas do monarca combinaron o optimismo e a confianza ante as potencialidades dunha gran nación como España co rexeitamento daqueles partidos que fan da confrontación un xeito de vida e mesmo de supervivencia política”, aseverou Tellado.
