"Somos a única candidatura que pode garantir que Galiza non sofrerá o bloqueo que leva oito meses sufrindo España", dixo Feijóo, para quen a formación conservadora é a única con capacidade de "comezar a traballar ás poucas horas de que fechen os colexios eleitorais, sen perder o termpo nen facer perder diñeiro" ás e aos cidadáns.
O relato do PP para esta campaña esta servido: dun lado, a seriedade e a estabilidade; doutro, a confusión e as guerras cainitas. Dunha banda "a división, as leas e as vendettas", doutra a "vocación" do PP de "servir os galegos". "Estamos centrados no que interesa á xente: dar estabilidade e achegar responsabilidade".
Estabilidade vai ser a palabra de orden da maquinaria eleitoral conservadora nos días que fican por diante até o 25 de setembro. "Gobernar é unha dedicación completa, non pode haber institucións estábeis sen partidos estábeis". Estabilidade e lideranzas fortes. "Non pode haber un presidente secuestrado polas minorías", dixo.
