Eleccións xerais

Feijóo: "Madrid non pasa pola miña cabeza"

O presidente da Xunta elude revelar se repetirá como candidato do PP nas eleccións galegas, mais advirte de que non irá en ningunha lista nas vindeiras eleccións xerais.

Rajoy e Feijóo en Madrid
photo_camera Rajoy e Feijóo en Madrid

“Non vou ir en ningunha lista ao Congreso nin ao Senado”, anuncia Alberto Núñez Feijóo a través dunha entrevista publicada por Faro de Vigo na que elude revelar se repetirá como candidato á Presidencia da Xunta de Galiza nas eleccións de 2016.

Feijóo, que afirma que esgotará a lexislatura, salienta que “Madrid non pasa pola miña cabeza, non está na miña cabeza e o meu corazón e o meu compromiso están en Galiza e intento demostralo todos os días”. “Cando teña que tomar a decisión de presentarme ás eleccións autonómicas tomarase e anunciarase”, resolve en español, como no resto da conversa, tratando de zafarse das preguntas da xornalista.

Precisamente, o pasado domingo, Feijóo anunciaba unha remodelación do seu Goberno, facendo ver que prima o peso dos servizos sociais e que deixa atrás a austeridade. Con estes cambios, entre os que destacou a destitución da ex concelleira de Sanidade, Rocío Mosquera e o relevo de Rosa Quintana á fronte de Medio Rural, Feijóo tenta darlle un pulo á súa acción de goberno de cara as próximas eleccións galegas, que serán, previsibelmente, no outono.

Comentarios