O líder do executivo galego responsabilizou ao Banco de España e ao Goberno de José Luís Rodríguez Zapatero do desmantelamento do sistema financeiro galego. Aliás, Alberto Núñez Feijóo denunciou "presións" por parte dos mesmos que se resistían, asegurou, a un proceso de fusión apoiado pola práctica maioría d@s galeg@s.
Aliás, o presidente da Xunta de Galiza eludiu a responsabilidade do goberno galego na fraude das preferentes e nas millonarias indemnizacións dos ex-directivos das caixas nas que dixo "non ter competencias" embora calificalas de "reprobábeis" e "discutíbeis".
Alberto Núñez Feijóo gabouse na súa comparecencia da xestión política da Xunta que, di, "permitiu o mantemento dunha entidade financeira galega". Porén, os grupos da oposición retrucáronlle cun "até cando?", como inquiriu o portavoz do Bloque Nacionalista Galego, Francisco Jorquera en relación coa inminente venda de NovaGalicia Banco a un banco ou fondo de investimento estranxeiro.
A estafa das preferentes responsabilidade "da mala comercialización"
Para o presidente da Xunta, o calote das participacións preferentes e subordinadas non é responsabilidade da administración galega "nin do bipartito" nin dos sucesivos gobernos do Partido Popular. No entanto, nin a oposición nin as Plataformas de afectad@s por este calote partillan a opinión do líder do executivo e lembráronlle a Núñez Feijóo que foi unha lei de 2003 --durante o goberno de José María Aznar-- cando se autorizou a comercialización deste tipo de produtos híbridos de carácter fraudulento.
Así as cousas, Feijóo atribuíu a "unha mala comercialización na maioría dos casos" a estafa que atinxe a 80.000 aforrador@s galeg@s. Asemade, afirmou que este "problema" deu boa conta "da deriva das caixas e da súa clamorosa ausencia de supervisión". Núñez Feijóo, neste senso, acusou ao supervisor do Banco de España de actuar "máis como un político" que como un supervisor. De maneira velada, o presidente da Xunta insinuou que as actuacións deste responderían á aplicación dos mandatos do goberno de Madrid, naquela altura en mans do PSOE.
As indemnizacións dos ex-directivos das caixas
O presidente da Xunta de Galiza, declinou boa parte das responsabilidades do desmantelamento do sector financeiro galego na cúpula das extintas caixas. Núñez Feijóo, deitou, aliás, a responsabilidade do seu mantemento á fronte da entidade financeira resultante da fusión (NCG) nunha "condición inescusábel" imposta polo Banco de España para dar luz verde ao proceso. No entanto, a reforma da lei de caixas pactada entre populares e socialistas permitiu que os ex-directivos de Caixa Galicia e Caixa Nova se mantivesen á fonte de NovaCaixa Galiza após a fusión.
"Esa prórroga transitoria", afirmou Joquera en relación ao termo empregado polo voceiro do PP, Pedro Puy, "serviu para mudar os contratos e mellorar as condicións das súas indemnizacións" nun exercicio, dixo, de “toma el dinero y corre”.