A primeira reacción de Feijóo foi a típica nel. A evasiva. Sexta feira, cando ardía twitter e todas as redaccións procuraban reaccións políticas, Feijóo lembrou ao mellor Houdini, o célebre mago escapista. Dixo daquela o presidente da Xunta que non vira o debate íntegro e que ignoraba as declaracións posteriores de Cañete.
Agora, como o resto do partido, e conscientes do dano que o escándalo lle pode estar a inflixir nas enquisas, Feijóo cambia de rexistro e admite que a frase sexista de Cañete -a de que non utilizou a súa superioridade intelectual perante Valenciano para non parecer machista- foi unha afirmación "equivocada".
Feijóo, ortodoxo
Porén, e só un segundo despois, Feijóo alíñase coa ortodoxia do seu partido e do seu chefe -Rajoy saíu en defensa de Cañete ao que cualificou de mellor candidato dos que se apresentan en campaña- ao loar a xestión do ex ministro, moi contestada nos sectores produtivos galegos.
"Produciuse unha frase equivocada de alguén cunha traxectoria e unha xestión moi acertada, sólida e cun currículo de servizos moi importante", dixo Feijóo.
A estratexia comunicativa do PP complétase cun contra-ataque ao PSOE. Así, Feijóo acusou o partido de Rubalcaba de "centrar a campaña nunha frase equivocada pronunciada por alguén cunha xestión acertada".
O PSOE, argumentou Feijóo, prefire montar a súa campaña sobre a afirmación machista de Cañete e non sobre "a xestión económica ou sobre o que fan os socialistas franceses". Feijóo pronunciouse nestes termos durante un coloquio organizado por El Mundo de Andalucía.
