Martes de Entroido e debate parlamentar. O deputado ourensán da Alternativa Galega quixo aproveitar a súa quenda de intervención no Pleno que decorre esta terza feira para encetar unha brincadeira propia dunha das datas máis sinaladas do almanaque galego, nomeadamente en Ourense. Porén, o vice-presidente da Cámara, Miguel Santalices chamou até en tres ocasións á orde ao parlamentar por non se estar a centrar no tema obxecto de debate, a proposición de lei presentada polo BNG a prol da dación en pagamento.
Após emitir tres chamadas á orde en menos de dous minutos, o deputado foi expulsado da Cámara. Cuestión que motivou unha cuestión de orde por parte do voceio de AGE, Xosé Manuel Beiras e dos portavoces de BNG e PSdeG quenes acusaron ao presidente en funcións --por ausencia de Pilar Rojo-- de se estar a "extralimitar" nas súas funcións. No entanto, Miguel Santalices recuncou na súa decisión o que provocou a saída do grupo parlamentar da Alternativa da Cámara.
Neste senso, AGE aseguraba na súa conta de twitter que "Santalices aplica o regulamento parlamentario con lóxica de guerra e os inimigos están, para el e o seu partido, claros".
Artigo 106 do Regulamento
Após o regreso da presidenta Pilar Rojo ás súas funcións, o voceiro nacionalista deu lectura nunha cuestión de orde ao artigo do Regulamento en que se recollen as sancións impostas desde a presidencia como resposta a un "desorde" na sesión. Francisco Jorquera considerou que o proceder de Miguel Santalices non se correspondía co fixado polo devandito artigo ao non se dar aviso previo ao deputado das consecuencias dunha "terceira chamada á orde", polo que exixíu " a retirada da sanción" en aras "da normalidade da Cámara.
Tamén así, desde o grupo socialista se demandou a reconsideración da decisión adoptada ao entenderen que a brincadeira a respecto da corrupción no PP que centraba a intervención do relator de AGE "non estaba tan lonxe da cuestión" que acollía o debate ao se trataren ambos os dous temas nun "problema económico e social" existente na realidade, quer os desafiuzamentos quer a corrupción política.
Un ataque "á soberanía popular" e "á liberdade de expresión"
O grupo parlamentar da Alternativa denuncia que o PP considerou nun comunicado que a expulsión de David Fernández "é un ataque inaceptábel á sobernaía popular" ao considerar o PP, din, "que o Parlamento é da súa propiedade". AGE asegura que a intervención do seu deputado era "humor satírico" enmarcado nas datas de Entroido e rexeitan a decisión adoptada polo vicepresidente Miguel Santalices, cando este ocupaba de maneira temporal as funcións da presidencia. Esta, din, "é unha proba máis de como o PP concibe as institucións" e advirten que "non permitirán" que o proceder d@s populares "impidan que o conflito social e político" que existe nas rúas sexa expulsado "do debate parlamentar".
Imaxe da capa: AGE
