‘Euskal presoak, euskal herria’. Dereitos humanos. Resolución Paz’ En torno á faixa que recollía este lema marcharon este sábado en Bilbo miles e miles de persoas, nunha das mobilizacións máis multitudinarias dos últimos anos en Euskal Herria. ‘#SalatzenDut’ (Eu denuncio) foi a palabra de orde da marcha e da campaña que decorre desde hai semanas para pedir o respecto dos dereitos dos presos vascos. A súa imaxe, un puño co índice erguido. A fin da política de dispersión, a posta en liberdade dos presos con enfermidades moi graves, a fin do réxime FIEs foron algunhas das demandas presentes na xornada. Según o cálculo de Gara, por volta de 78.000 persoas participaron na manifestación.
A mobilización contou cun amplo apoio de organizacións políticas, sindicais e culturais para alén de múltiples movementos e entidades sociais. Na cabeceira da marcha, familiares de presos vascos. O 81% destes presos cumpren condena a máis de 500 quilómetros dos seus fogares, co que iso implica para familias e amizades. A faixa principal foi levada por varias persoas, entre elas ex-presos de ETA, a filla de Santi Brouard, dirixente de HB asesinado polos GAL, e Rosa Rodero, viúva dun ertzaina asasinado por ETA.
A marcha estaba convocada por Sare Herritarra. Colapsou a rúa Autonomía e rúas adxacentes cunha maré de xente procedente de diferentes partes de Euskal Herria e tamén doutros territorios. Un dos seus voceiros, Joseba Azkarraga, denunciou a política penitenciaria do goberno español e afirmou que a presenza en Bilbo de miles de persoas amosaban que o pobo vasco estaba firmemente comprometido co proceso de paz malia a postura do executivo español.
"Que se escoite isto en Madrid e en París. Que se están a vulnerar os dereitos dos presos e presas vascas!" denunciaron na alocución final representantes de Sare. "Queremos poñer fin ao non dereito que aplica o estado español". "Non imos parar até que todos os presos estean en Euskal Herria".
