mércores 08.07.2020
Mentres, continúa a vetar a transferencia da AP9

O Estado resgata as 8 autoestradas madrileñas en quebra. Podería pagar até 5.000 millóns de euros

O goberno nega o resgate e traspaso da AP9 - infraestrutura que dá beneficios- mais adquire as radiais madrileñas 2, 3, 4 e 5, a M-12, a AP-41 (Madrid-Toledo), a circunvalación de Alicante e a Cartaxena-Vera.

O Estado resgata as 8 autoestradas madrileñas en quebra con até 5.000 millóns

O ministro de Fomento, Íñigo de la Serna, recoñeceu nunha entrevista en Los Desayunos de TVE que o Estado terá que asumir as oito autoestradas de peaxe que na actualidade están en quebra para evitar a súa liquidación e fechamento ao tráfico. Son seis vías de Madrid, unha en Alicante e a de Cartaxena-Vera. Un anuncio que chega apenas uns días despois de que o Estado comunicase a Núñez Feijóo a súa negativa a traspasar a AP9 a Galiza, negativa que se sumaba ao argumentario de que un resgate da Autopista do Atlántico sería caro, unha operación para a que non hai cartos. Porén, e segundo informa El País, o estado podería pagar até 5.000 millóns de euros para nacionalizar esas oito autoestradas en quebra.

O ministro dixo que as autoestradas van reverter no estado “e o estado decidirá como xestionalas” e enfatizou que o principal obxectivo do goberno neste eido é que as infraestruturas “continúen e os cidadáns poidan seguir a utilizalas”.

Esta 'nacionalización' das autoestradas é consecuencia da cláusula de responsabilidade patrimonial da administración: o estado ten que asumir unha infraestrutura en caso de quebra e pagar ás empresas concesionarias o importe do investimento que aínda non recuperou. Cláusula que garante que as grandes empresas responsábeis desas infraestruturas sempre van ver cubertos, no mínimo, os seus custos. Non asumen risco ningún. 

comentarios