Só ESTá DISPOSTA A "TRATAR" A INTEGRACIóN DE IPU NO MARCO FIXADO A SEXTA FEIRA

Encontro pola Marea Galega nega que se abra un "novo proceso" cara á unidade

Nas últimas horas houbo un certo ruxe ruxe de que IpU e Marea poderían reconstituír o foro político falido a pasada sexta feira baixo novas premisas. Un comunicado da Marea Galega vén arrefecer as expectativas: "Non existe ningunha convocatoria que supoña a abertura dun novo proceso". O clamor do mundo da cultura parece que será desouvido.

MArea galega
photo_camera MArea galega

Segundo puido saber Sermos Galiza, Iniciativa pola Unión deu traslado ao Encontro pola Marea Galega dunha proposta de reconstitución do foro político baixo a premisa de que se levantase o veto interposto por esta última plataforma á presenza de seis forzas políticas que participan en IpU [en concreto, Agora Galiza, PG, Terra Galega, PCPG, FOGA e Coalición Galega].

Esta mesma cuarta feira, nunha entrevista na Radio Galega, Rafa Cuíña, dirixente de Compromiso e membro da Coordenadora da IpU, deu por feito que as plataformas voltarían a se reunir esta sexta feira, nunha cimeira xa sen exclusións.

Estas expectativas non parece que se vaian cumprir de atérmonos á literalidade dun comunicado emitido esta mesma tarde polo Encontro Cidadán por unha Marea Galega. O colectivo limítase a dicer que coñeceu a "vontade" da IpU de participar no foro político constituído por el e por 6 forzas políticas -Anova, Cerna, Compromiso por Galicia, Espazo, Equo, Esquerda Unida- e que tratará a proposta de incorporación "no seo do propio foro entre todos os axentes que o conforman".

Isto significa que a entrada no foro non é aberta, senón que está condicionada á aceitación de novos ingresos por parte dos distintos actores que o compoñen e á asunción dos que poderíamos cualificar como os seus pontos fundacionais, entre eles a vontade de se presentar "unidas tanto ás eleccións xerais como ás próximas autonómicas".

As dúas formulacións son distintas. IpU propón pór o contador a cero e ir a un foro aberto en que se podan discutir unhas novas bases. A Marea, en troca, ve o proceso xa fechado

Nas bases constitutivas deste foro non aparece ningunha referencia á forma concreta de concorrencia ás eleccións xerais -isto é, a presenza ou non de siglas e nomes de partidos nas papeletas- e a alusión que se fai á constitución dun grupo parlamentar é ambigua. Dise literalmente que "as/os deputadas/os funcionarán a todos os efectos como un grupo parlamentario". Isto é, non se di que se vaian constituír como tal nen que o vaian facer separadamente dun grupo parlamentar estatal.

Mentres, nun escueto comunicado, Iniciativa pola Unión informaba esta terza feira á noite sobre a súa disposición a "participar activamente no foro aberto dirixido a todas as forzas políticas e sociais que desexaren participar nel e avanzar no diálogo cara á conformación dunha candidatura galega de unidade popular".

Está claro que as dúas formulacións son distintas. IpU propón pór o contador a cero e ir a un foro aberto en que se podan discutir unhas novas bases. A Marea, en troca, ve o proceso xa fechado e condiciona calquer incorporación á aceptación dunhas premisas estabelecidas a pasada sexta feira nunha reunión na que non estiveron presentes nen IpU nen o Bloque, que non acudiron en protesta polos vetos interpostos.

Comentarios