A empresa mixta para participar en proxectos eólicos e doutras enerxías renovábeis que impulsa a Xunta da Galiza a través dunha nova lei terá unha "maioría accionarial privada", algo que, segundo celebra o vicepresidente primeiro do Goberno, Francisco Conde, "vai permitir un plus de axilidade na xestión" e tamén "para que os investidores poidan participar na mesma".
Destacouno durante a súa comparecencia en rolda de prensa canda o presidente, Alfonso Rueda, após a reunión semanal do Consello, que aprobou esta quinta feira o anteproxecto da citada Lei de aproveitamento de recursos naturais, que prevé a figura desta nova sociedade mixta para as renovábeis.
Conde subliñou, a respecto desta cuestión, que a Xunta, a pesar da súa participación minoritaria, manterá unha "posición de control" e explicou que iso quedará plasmado "nos documentos fundacionais" da empresa. Neste sentido, referiuse a "mecanismos para blindar" que só participe en proxectos "de interese para a Galiza".
Xa o pasado mes de marzo, o presidente Rueda eludía aclarar se esta sociedade sería maioritariamente pública, mais si anticipaba que a Xunta non ostentaría o 100% da titularidade. Isto, porén, xa acontece noutros países europeos, como Noruega, onde a empresa Statkraft, o maior xerador de enerxía renovábel en Europa, é de capital 100% público. "Non o confirmo, xa veremos", dixera.
A creación dunha empresa público-privada para "promover proxectos de enerxía renovábel" que o Goberno galego aplaude en 2023 contradí a postura defendida por ese mesmo Executivo desde 2009. Foi un Goberno do PP o que vetou e baseou a anulación do concurso do Executivo de PSdeG e BNG en que ese tipo de sociedade mixta era un "atentado á liberdade de empresa".
Mais Alfonso Rueda, a preguntas de Nós Diario naquela intervención de marzo e cuestionado sobre ese cambio de actitude, dicía que esa fórmula mixta agora "é beneficiosa" porque estamos vivindo "momentos de madurez". "Figuras deste tipo son necesarias", engadira.
Tamén a preguntas dos medios, o presidente recoñecera entón que a nova lei e a sociedade mixta non van afectar os proxectos enerxéticos xa existentes ou en marcha. Afirmou que será para os que se poñan en andamento no futuro e, acrecentou, non para todos, senón só para aqueles que a empresa considere de interese.
