Galiza votará o 25 de setembro para elexir o seu Parlamento. Anunciouno esta segunda feira Núñez Feijóo nunha comparecencia de imprensa após un Consello da Xunta que convocou pola vía de urxencia. O presidente da Xunta asinará esta segunda o decreto de disolución da Cámara galega e xustifica convocar os comicios o 25 de setembro, canda as vascas e após semanas defendendo que ían ser en outubro, na "responsabilidade" e "seriedade".
"Non sería serio pola miña parte convocar as galegas unha semana ou algúns días máis tarde cas vascas só por saírme coa miña de que fose en outubro", manifestou, e insistiu enq ue a decisión era por responsabilidade "con Galiza e con España". Nesta liña, defendeu que esta decisión supón achegar "estabilidade" nun panorama electoral español que vén de realizar 2 eleccións xerais en seis meses e coa posibilidade dunha terceira convocatoria aínda pendente.
O almanaque electoral:
2 de agosto: publícase no DOG a convocatoria electoral
Do 17 ata o 22 de agosto: prazo para presentar candidaturas
29 agosto: proclámanse os candidatos
9 de setembro inicio de campaña
23 de setembro fin de campaña
24 de setembro: xornada de reflexión
25 de setembro: votacións