O prazo para a presentación de coalicións electorais finaliza esta sexta feira co panorama máis despexado que para o 5 de abril, aínda que haberá que esperar aínda á última da xornada de mañá para despexar as incógnitas das alianzas, previsibelmente catro, para a cita coas urnas do próximo 12 de xullo.
Galicia en Común-Anova Mareas, que para a pasada cita do 5 de abril apurou os trámites ao fío da medianoite, rexistrou xa hoxe, con máis de 24 horas de marxe, a súa coalición diante da Xunta Electoral, na que pediran cita previa para poder cumprir con este trámite de forma presencial, como é preceptivo agora no Pazo do Hórreo.
Os termos son os mesmos que os pactados para o 5 de abril e unicamente se recollen un par de modificacións ou matizacións fronte ao que se fixo naquela ocasión, na que até cinco minutos antes da medianoite non se asinou o acordo finalmente rexistrado.
Así, segundo fontes da coalición consultadas por Europa Press, o pacto económico queda máis concreto e especificado. O 70% dos recursos económicos son para a rama Unidas Podemos (a repartir entre Podemos e Esquerda Unida, aínda que non queda plasmado como é a distribución).
O 30% restante é para Anova que, no propio acordo rexistrado na Xunta electoral, se especifica que o poderá repartir. Desta maneira, a formación nacionalista creada por Xosé Manuel Beiras queda cun 19% dos fondos, un 6% é para Marea Atlántica e un 5% vai para Compostela Aberta.
Previstas outras tres coalicións
Á marxe desta coalición, En Marea, Compromiso por Galicia e o Partido Galeguista negociaron na última semana unha coalición que está próxima a frutificar, pero que polo menos terá que esperar a esta sexta feira a ser rexistrada na Xunta Electoral. A ela tamén se sumarían varias marcas municipalistas.
Ademais, concorrerán en coalición Espazo Común, a formación impulsada polo que foi secretario xeral do PSdeG Manuel 'Pachi' Vázquez, xunto a Recortes Cero e Os Verdes cara ás próximas eleccións do 12 de xullo.
A cuarta coalición chámase Unidos polo futuro!, e é a alianza de Unidos pola Solidariedade Internacional, Democracia Efectiva e Unión Demócrata do Pobo, cuxo presidente, José Carlos Seoane Osorno ratificou a Europa Press que volverán concorrer.
"Traemos un proxecto novo, unhas ideas revolucionarias, unha nova maneira de facer política e de democracia", asegurou o presidente de Unión Demócrata do Pobo, a formación galega de referencia neste pacto e que achega a maioría de nomes ás listas electorais.
Ciudadanos
Mentres, Ciudadanos está a insistir ao Partido Popular para concorrer en coalición ás eleccións galegas, a pesar de que xa o intentaron en febreiro e non foi posíbel alcanzar un acordo.
O PP, con Alberto Núñez Feixoo á fronte, segue sen abrirse a esta fórmula e prefire presentarse coas súas propias siglas. As populares sosteñen que o seu proxecto está "consolidado" na Galiza, onde o actual presidente da Xunta logrou tres maiorías absolutas consecutivas.
