David Fernández Calviño deixará a finais de outubro o Parlamento após aceptar un contrato de investigación na Universidade de Copenhage, segundo comunicou a través dunha misiva á militancia de Anova.
O deputado por Ourense asegura que a decisión supón "unha grande oportunidade" para el e que, en realidade, nunca quixo "ser un político profesional". Así o recolle Galicia Confidencial facéndose eco da carta enviada polo parlamentar.
Así mesmo, Fernández Calviño afirma que permanecer máis tempo afastado do terreo científico complicaría máis a súa volta á investigación.
A militante de Esquerda Unida, Carme Iglesias Sueiro, sucede a David Fernández na orde estabelecida na listaxe electoral da coligación en Ourense. Porén, e segundo recolle Europa Press, a formación manterá o equilibrio na representación das forzas que a integran e será Iolanda Pérez Docampo quen tome posesión do escano.