Os partidos da oposición reaxiron ao discurso pronunciado por Feijóo o 31 de decembro con motivo do remate do ano. O portavoz de En Marea, Luís Villares afirmou que o presidente da Xunta remata o ano “como o encetou, enganando a xente”. Cualificouno de “covarde” por se esconder “con Catalunya para non amosar a súa insignificancia” en debates como o do financiamento autonómico ou como o das infraestruturas.
A emigración, a “división” que supoñen a reforma sanitaria, a subida das peaxes da AP9, a ausencia dunha rede ferroviaria de proximidade ou a falta de conexión de Galiza con Europa a través dunha liña de tren de mercadorías foron algunhas das cuestións citadas por Villares.
PSdeG: Acusa Feijóo de triunfalista e autocompracente
Con menor dureza pronunciouse o secretario xeral do PSdeG, Gonzalo Caballero, quen cualificou a intervención do presidente da Xunta –que tivo lugar na mostra do Pergameo Vindel en Vigo– de triunfalista, autocompracente e de autobombo.
O socialdemócrata acusou Feijóo de “esquecer os problemas da Galiza real para recrear unha situación idílica”. Botou en falta “os baixos salarios e pensións”, os “recortes nos servizos públicos”, a “maior exclusión” e “unha preocupante desigualdade”, así como autocrítica na xestión da vaga de incendios do pasado mes de outubro.
BNG: Feijóo, o “delegado de Rajoy en provincias”
Desde o Bloque a encargada de pronunciarse a respeito do discurso de Feijóo foi a viceportavoz parlamentar, Olalla Rodil, quen botou en falta “un verdadeiro presidente da Xunta”, que actúa, dixo, como “delegado territorial de Mariano Rajoy en provincias”.
Após criticar a “realidade propia e irreal, baseada na propaganda” de Feijóo, advertiu de que na Galiza “crece a precariedade laboral e a desigualdade social como consecuencia das súas políticas e submisión ao goberno de Rajoy”.
Lembrou o aumento da fenda “entre os máis ricos e os máis empobrecidos” e as subas do prezo de “peaxes, luz, teléfono ou gasóleo”, cando Galiza “padece os salarios e pensións máis baixas”.
Rodil tamén acusou Feijóo de “seguir a esconder a súa irrelevancia políticas detrás da bandeira española”.