Após unha xuntanza desenvolvida esta terza feira entre os líderes de CxG e BNG, o secretario xeral de Compromiso considerou "difícil" a posibilidade de que as forzas políticas soberanistas concorran nunha única "candidatura galega" ás eleccións europeas do 2014. Segundo o voceiro de CxG, para se producir esta confluencia é preciso un "programa de mínimos profundamente europeísta".
Neste senso, a organización frontista vense amosando contraria á actual andamiaxe política e xurídica das institucións comunitarias. Esta diverxencia entre ambas as dúas formacións podería constituír a principal eiva na procura de artellar esa candidatura galega cara ás europeas. Porén, desde CxG o seu secretario xeral salientou a premura das valoracións, sendo que esta é a primeira xuntanza dunha rolda de contactos máis ampla que abranguerá outras organizacións políticas.
Así pois, o portavoz de Compromiso quixo "parabenizar" o Bloque pola iniciativa e a vontade de "priorizar unha candidatura" en chave de país cara aos comicios europeos. A proposta de xerar unha "grande candidatura que leve a voz de Galiza a Bruxelas" foi anunciada polo portavoz nacional do Bloque esta fin de semana nunha entrevista na Radio Galega.
Xavier Vence asegurou que a organización frontista aposta na articulación dunha "maioría nacionalista" para combater a crise e as políticas neoliberais. A xuntanza co líder de CxG é a primeira dunha rolda de contactos que se desenvolverán nos vindeiros días.