As persoas que transitan xa pola terceira idade non só baten cos problemas da "exclusión social e a marxinalidade", senón que con frecuencia sofren agresións, entende Compromiso por Galicia.
Formación política extraparlamentar, anuncia a presentación na cámara galega dunha iniciativa contra o maltrato ás vellas e aos vellos "para que a Mesa da Cámara a tome en consideración", di a organización galeguista por medio dun comunicado de imprensa.
"Desde a Organización Mundial da Saúde apuntan á necesidade de lexislar sobre o maltrato ás persoas maiores xa que é un problema de saúde pública e da sociedade" , afirma o secretario xeral de CxG, Juan Carlos Piñeiro.
Para Compromiso, unha vez que o Parlamento lexisle sobre o asunto, a Xunta debería fornecer os recursos necesarios para paliar un problema social detectado "polos profesionais de atención primaria", facultativos que, argúe a formación galeguista, "aínda que contan cunha guía de boas prácticas non teñen da súa man os medios legais para actuar sobre estes casos".