Unha de cal e unha de area a que dá o Consello Fiscal no seu informe a respeito do anteproxecto de lei polos dereitos do concibido e da muller grávida. O órgao recolle en 59 páxinas --que serán remitidas ao goberno español-- as súas valoracións en relación coa reforma que prevé aprobar o Ministerio de Xustiza mais que, segundo os pronosticos, non se levará a Cortes até o mes de setembro.
Segundo o Consello Fiscal a proposta lexislativa de Gallardón é unha "inoportunidade" habida conta, sinalan no informe, que o recurso presentado polo Partido Popular contra a Lei de Interrupción Voluntaria do Embarazo, coñeciza como lei de prazos, aínda está pendente de resolver polo Tribunal Constitucional.
Apoia as sancións ás mulleres que aborten por "coherencia penal"
![Publicidade 195634]()
No entanto, no seu ditame o Consello afonda nalgunhas cuestións e mesmo defende --como xa fixera o Consello Xeral do Poder Xudicial-- a fixación de sancións para as mulleres que "se causen o seu propio aborto ou consintan que outro llo cause". O contrario, din @s fiscais, fai que o proxecto de lei "careza de coherencia" penal.
O Consello ampara a súa argumentación na doutrina do Tribunal Constitucional de retornar o marco lexislativo "sistema puro de indicacións" sempre que se "respecte o principio de proporcionalidade" en relación cos dereitos do nascituro e da nai.
O informe di que o aborto euxenésico podería ser unha "opción de política criminal"
No tocante á supresión do suposto de aborto euxenésito por razóns de inviabilidade do feto o Consello Fiscal súmase á opinión amosada polo Consello Xeral do Poder Xudicial e aposta en desligalo do prexuízo psicolóxico ao entender, di o informe, que "o suposto de aborto euxenésico podería ser entendida como unha opción de política criminal". No entanto, sinala que é "susceptíbel de debate" polo que "non pode darse por rematada" a discusión sen ser "cuidadosamente reflexionada".
Finalmente, a respeito dun dos elementos contidos na anterior lei e que ergueu maior confrontación para o Partido Popular o Consello Fiscal entende que a autorización da nai/pai/titora legal dunha menor que queira interromper a súa gravidez é "unha exixencia inherente ao cumprimento das súas funcións" mais, acrecenta, "pode non ser aconsellábel no caso de menores emancipadas ou de 16 e 17 anos a quen se debe recoñecer un grao de autonomía superior".
