O Congreso español aprobou esta quinta feira definitivamente a Lei Orgánica do Sistema Universitario (LOSU) cos votos a favor do PSOE, Podemos, ERC, PNV, Más País e Compromís; en contra o PP, Vox, Cs, BNG, UPN, CUP e Foro Asturias; e coas abstencións de EH Bildu e Junts.
A nova Lei, segundo o ministro de Universidades, Joan Subirats, propón medidas para a "redución da precariedade na Universidade", dereitos para o estudantado como o "paro académico" ou un compromiso de gasto de 1% do PIB para 2030.
Porén, os grupos que votaron en contra alegaron que "non é a Lei que precisan as universidades". Neste sentido, o deputado do BNG no Congreso, Néstor Rego, cualificou a Lei como "privatizadora e centralizadora", e dixo que non "permitirá o desenvolvemento dun modelo propio" para as universidades galegas.
Ensinanzas artísticas
Na xuntanza da Conferencia Sectorial de Educación que decorreu onte, departamentos de Educación das comunidades do Estado, entre elas a Consellaría de Educación da Xunta da Galiza, solicitaron ao Goberno do Estado a "equiparación real" entre os estudos artísticos superiores e os universitarios, unha medida xa instaurada coa implantación do Plan Boloña e desbotada poucos anos despois.
