Seis concellos de Ferrolterra, Eume e Ortegal procurarán unha alternativa mancomunada a Sogama

Así o acordaron os rexedores de Narón, San Sadurniño, As Pontes, Cariño, A Capela e Mugardos na xornada de traballo desenvolvida esta terza feira. 

Alternativa Sogama
photo_camera [Imaxe: Concello de San Sadurniño]

Os alcaldes destes seis concellos decidiron esta terza feira, reunidos en San Sadurniño, que encetarán os traballos técnicos para procuraren unha alternativa ao modelo de xestión de residuos desenvolvido por Sogama. 

O acordo alcanzado polos seus rexedores, ao que previsibelmente se sumarán tamén os gobernos de Ares e Monfero, suporá a creación dunha comisión de traballo conxunta na que persoal técnico de Narón, As Pontes e San Sadurniño estudará posíbeis alternativas á incineración que sexan, explicaron, "máis viables economicamente e máis sustentables ambientalmente e socialmente". Mais non só. O obxectivo deste grupo será tamén, explicou José Blanco, rexedor de Narón, "conectar" as iniciativas que se vaian desenvolver coas doutros concellos de Galiza para chegar a unha solución "que poida ser viábel para todos". 

Neste senso, a proposta é a resposta non só ao incremento nun 34% do custe actual do servizo ofrecido por Sogama, senón tamén a resposta a un "modelo esgotado" desde o punto de vista ecolóxico, asegurou Secundino García, rexedor de San Sadurniño. Este alcalde do BNG denunciou os incumprimentos da planta de Cerceda en materia de xestión de residuos. "[Sogama] está cobrando por un servizo que non nos está prestando, xa que nos cobra por soterrar o lixo coma se o estivese tratando". 

San Sadurniño non pagará o novo canon

A respeito da primeira factura co novo prezo, remitida por Sogama nos últimos días, a algúns dos concellos, as decisións adoptadas polos gobernos locais son dispares. Entrementres Narón avanzou que trasldará o custo aos petos da veciñanza --o que suporá 300.000 euros anuais a maiores-- San Sadurniño avanzou que non pagará o incremento de acordo co fixado no contrato que asinou o concello con Sogama e no que tan só se fixa unha suba máxima ao ano parella ao IPC. 

Segundo adiantou Secundino García, o concello "ten dereito a esixirlle a SOGAMA que non cobre máis que o que pon o contrato". A este respecto, García apuntou que a factura correspondente ao mes de marzo xa pasou á intervención municipal para que emita os informes correspondentes, algo que tamén están a facer noutros concellos do país como Monforte. 

Comentarios