Malia confirmar a pasada cuarta feira a presenza de Isabel Cendán, número 1 de Ciudadanos ao Congreso pola circunscrición electoral de Lugo, ao debate electoral de Sermos Galiza para a mañá da segunda feira, 7 de decembro, o partido político liderado por Albert Rivera non enviará ningún representante. O equipo de comunicación de Ciudadanos informou Sermos Galiza de que non asistiría ningún candidato ou candidata da formación política cando o número 1 pola Coruña, Antonio Rodríguez, recoñeceu que carecen de propostas para Galiza. “Agora mesmo o que toca é unha proposta nacional [estatal] común”, apuntou o cabeza de lista de Ciudadanos nunha entrevista concedida a V Televisión.
Pola outra banda, o Partido Popular, que a terza feira confirmara a presenza de Marta González, número 2 pola Coruña e viceportavoz do PP no Congreso, comunicou a imposibilidade de que participe no debate esta candidata, sen que á hora da edición desta noticia nos comunicasen quen vai asistir no seu lugar.
Un debate con perspectiva galega e plural
O debate organizado por Sermos Galiza foi concibido como un intercambio e discusión de propostas políticas no marco das eleccións xerais desde unha perspectiva galega e plural, sen exclusións e terá lugar esta segunda feira, 7 de decembro, ás 12h, na Nave de Vidán (Avda. Mestra Victoria Míguez, 44, Compostela) e será aberto a quen desexe asistir. Amais, retransmitirémolo ao vivo a través de www.sermosgaliza.gal. O hashtag para seguir o debate nas redes sociais será #SermosDebate.
O debate articularase arredor de catro blocos temáticos: economía e traballo, política internacional, dereitos sociais e liberdades públicas e Galiza, ante o debate territorial. Ademais, ao finalizar estes blocos, as candidatas responderán as preguntas recibidas a través das redes sociais e do correo electrónico e farán o propio coas interpelacións que faga o público presente no debate.
Á vista dos anuncios de Ciudadanos e do Partido Popular, nestes momentos, temos confirmada a participación de Pilar Cancela (nº1 do PSOE por A Coruña), Carme Adán (nº1 de Nós, Candidatura Galega por Pontevedra) e Yolanda Díaz (nº2 de En Marea pola Coruña).