“Necesitamos un grupo parlamentar como auga de maio”, admitiu Cayo Lara na mañá do sábado perante o Consello Político Federal de IU. Mais para facer posíbel o grupo parlamentar propio, IU necesita dos parlamentares integrados no grupo de Podemos, é dicir, de Yolanda Díaz, coordinadora nacional de EU, e dos cataláns.
Segundo Cayo Lara, conta co compromiso de Ciudadanos e mais do PSOE para permitirlle a IU formar grupo de seu se aos seus dous deputados, Alberto Garzón e Sol Sánchez, se lles unen os membros de IU que se presentaron baixo o paraugas de En Marea –caso de Yolanda Díaz- e de En Comú Podem –caso de Joan Mena e Félix Alonso.
IU ten até as 14h deste sábado de prazo para presentar formalmente a súa solicitude
![Publicidade 195691]()
O dirixente de IU sinalou que a organización ten até as 14h deste sábado de prazo para presentar formalmente a súa solicitude, co fin de que a Mesa do Congreso estuda a proposta a próxima terza feira.
Cayo Lara lembrou a delicada situación económica na que se atopa IU –que se vería abocada a desenvolver un plan de axuste que implicaría o despedimento de traballadores e traballadoras- após ficar sen grupo de seu no Congreso.
EU de Arousa demanda a expulsión de Yolanda Díaz por "tránsfuga"
Doutra banda, o Consello Comarcal de EU en Arousa solicitou que se lle aplique a Yolanda Díaz o réxime disciplinario da formación política, o que suporía a súa expulsión, por se integrar no grupo parlamentar de Podemos. Os arousáns xa emprazaran a coordinadora nacional de EU a se sumar aos dous parlamentares de IU no grupo mixto.
Segundo publica La Voz de Galicia, IU de Arousa ve a situación de Yolanda Díaz, que optou por integrarse no grupo parlamentar de Podemos e non no grupo mixto cos deputados de IU, "un evidente caso de transfuguismo". Advirten, ademais, que consideran rotos os lazos da alianza eleitoral no seo de En Marea.
