“Enchufes 2.0”, así denominan unha outra modalidade máis de obter un posto de traballo por vía familiar. A ForGa -Fundación para a Orientación Profesional, a Investigación e o Desenvolvemento tecnolóxico, o Emprego e a Formación na Galiza- vén de facer públicos vinte e seis postos de traballo en mans de familiares de altos cargos do PP, denunciando máis unha vez o “saber-facer” profesional do Partido Popular.
Entre estes nomes podemos sinalar:
Elisa Robles Fraga, directora xeral do Centro para o desenvolvemento tecnolóxico industrial (CDTI) e sobriña do ministro franquista e ex-presidente da Xunta de Galiza, Mauel Fraga.
Víctor Calvo Sotelo, secretario de estado de telecomunicacións e fillo do que foi presidente do goberno español Leopoldo Calvo Sotelo.
José Ramón Bujanda, presidente de SAECA -empresa de carácter público participada pola SEPI e o ministerio de agricultura-, é cuñado –precisamente-- do ministro de agricultura, Miguel Arias Cañete.
José Miguel Martínez, presidente da Sociedade estatal de loterías e apostas do estado, dependente do Ministerio de Facenda, “casualmente” é concuñado de Cristóbal Montoro, ministro de Facenda.
Ricardo Cospedal García, irmán da secretaria xeral do PP e presidenta de Castela-A Mancha, será o futuro director da Fundación Carolina de estudos internacionais.
Marcelino Oreja Arburua, nomeado presidente da Entidade pública empresarial de ferrocarrís –á que lle queda pouco de pública segundo adiantou o goberno español--, é fillo de Marcelino Oreja Aguirre, ex-ministro de asuntos exteriores.
Álvaro Ramírez de Haro y Aguirre, é asesor de estado de comercio e fillo de Esperanza Aguirre.
