sábado 06.06.2020
As eleccións a ollos de... Anxo Quintana

"Unha campaña tan españolizada é nociva para os intereses dos galegos e das galegas"

O ex vicepresidente da Xunta recoñece que segue a campaña electoral “desde a distancia”. Unha campaña, engade, “moi españolizada” e na que está a ser “difícil” introducir unha “axenda galega”. Sitúa o seu interese nas votacións do 28 de abril en ”saber até que punto Galiza vai ter ou non representación propia”.

Anxo Quintana
Anxo Quintana

Anxo Quintana foi alcalde de Allariz (1989-1999), senador nas Cortes españolas (2000-2005) e vicepresidente da Xunta de Galiza entre 2005 e 2009. Quen fora portavoz nacional do BNG entre 2003 e 2009 leva anos retirado da primeira liña da política. Ve a campaña “desde a distancia”, advirte ao inicio da pequena conversa con Sermos Galiza, mais considera que esta, a campaña, está “moi españolizada”, un factor que fai que sexa “moi difícil introducir a axenda galega e o debate sobre Galiza na campaña electoral”.

Os debates televisados entre as principais forzas estatais contribúen, engade, a “fortalecer aínda máis esa españolización da campaña, que creo é tremendamente nociva para Galiza e para os intereses dos galegos e das galegas”.

O gran reto da vindeira lexislatura é que Galiza estea presente

Quintana sitúa o interese da campaña e das votacións do 28 de abril en "saber até que punto, e a pesar destes pesares, Galiza vai ter ou non representación propia no Congreso”.

O día despois do 28A iniciarase unha nova lexislatura e nela o debate territorial vai ser determinante, considera. “Sexa cal for o resultado [das votacións do domingo], gañe o chamado bloque da dereita ou o da esquerda a vindeira vai ser unha lexislatura de debate territorial”, manifesta.

“Se gaña a dereita, haberá unha recentralización que sería tremendamente prexudicial para Galiza e no caso de gañar o bloque da esquerda, se ben iso non é garantía de nada, si que se abriría o debate e camiñarase sen dúbida cara a un Estado asimétrico”. Sexa como for, o ex vicepresidente galego entende que “o valor das nacionalidades vai a cobrar maior peso e nese debate resulta fundamental que estea Galiza e Galiza só vai estar se ten unha representación política propia. Ese é o gran reto da vindeira lexislatura e a importancia de que Galiza estea presente”.

comentarios