Acompañado da parlamentar do BNG Ana Pontón, do portavoz municipal do BNG, Rubén Cela, e de candidatos e candidatas de Nós, Carlos Callón reivindicou ao pé da estación dos camiños de ferro de Compostela “unhas conexións ferroviarias dignas, acordes ás necesidades do país, porque melloran a calidade de vida de todas as persoas e porque é estímulo para a creación de emprego e economía”. O cabeza de lista pola Coruña advertiu diante dos medios de comunicación do “agravio histórico” que padece Galiza respecto do transporte ferroviario.
Callón denuncia que o estudantado viaxa amoreado nos vagóns dos comboios
Callón lembrou que “desde que o nacionalismo galego existe reivindicáronse conexións ferroviarias dignas” e lamentou que “aínda non se nos estea a escoitar como merecemos”. Neste sentido, salientou que “hai moito que avanzar”, sobre todo, no que atinxe a traxectos, horarios e prezos dignos, “estamos en 2015 e parece que estamos en 1915”. Puxo como exemplo, os días en que o estudantado ten que viaxar “amoreado” nos vagóns dos comboios, “como se estivésemos a inicios do século XX”.
Nós, Candidatura Galega esixe medidas de seguridade para evitar sinistros como o de Angrois
Pola outra banda, o número 1 de Nós, Candidatura Galega pola Coruña fixo fincapé no “mazazo dramático” que viviu o país co accidente do Alvia en Angrois o 24 de xullo de 2013. Respecto disto, denunciou a falta de seguridade de varios tramos e criticou a inauguración de partes da rede ferroviaria sen os sistemas de seguridade acaídos. “Máis de dous anos após o accidente, non se puxeron medidas, isto non acontecería en ningún país civilizado”, apuntou.
En catro ocasións, o PP e o PSOE tombaron propostas do nacionalismo galego no Congreso para abrir unha comisión de investigación sobre o sinistro do Alvia
Ademais, sinalou que a “ferida social e emocional” aberta a raíz do sinistro do Alvia non se fechou, pola falta de “reparación” e de “xustiza”. Callón, que apelou á non impunidade”, subliñou que “até en catro ocasións, Olaia Fernández Davila e Rosana Pérez presentaron iniciativas para reclamar a apertura dunha comisión de investigación”. As catro, lembrou, foron tombadas polo PP e polo PSOE. Tamén foi crítico con estes partidos por “non deixar oír a voz da asociación de vítimas”. “Foi Ana Miranda quen levou a súa voz a Bruxelas, alí puideron explicar o que no Congreso e no Parlamento non poden porque o PSOE e o PP se negan”.
