Abel Caballero compara as protestas de veciñanza no pleno "co fascismo dos anos 30"

"Son rebentadores da democracia, tentan rebentar o pleno pero non o van conseguir. Isto facíao o fascismo nos anos 30, o mesmo que vostedes aquí", dixo o rexedor, ante as interpelacións de representantes da plataforma social 'Vigo somos todxs'.
Representantes da plataforma 'Vigo somos todxs' acudiron ao pleno desta cuarta feira.
photo_camera Representantes da plataforma 'Vigo somos todxs' acudiron ao pleno desta cuarta feira.

O alcalde de Vigo, Abel Caballero, protagonizou esta cuarta feira un tenso enfrontamento cun grupo de veciños e veciñas da asociación Avibe, que se opón á construción dun vial en Beade, aos que acusou de querer "rebentar" o pleno e de actuar "como o fascismo dos anos 30".

Os veciños, que presenciaban como público a sesión plenaria, interromperon algunhas intervencións e, no momento no que ía tomar a palabra a concelleira de Urbanismo, María José Caride, no debate dunha moción do BNG sobre parques eólicos mariños, os membros da asociación, comezaron a corear: "Vigo somos todos! Vigo somos todas!".

Nese momento Caballero interrompeu o debate e dirixiuse directamente aos veciños que protestaban, aos que se referiu en máis dunha decena de ocasións como "rebentadores da democracia". "Están a rebentar un pleno, o que fala do seu talante democrático. Garden silencio ou mando desaloxar", advertiu o rexedor.

En vista de que as protestas continuaron, o rexedor volveu insistir: "Son rebentadores da democracia, tentan rebentar o pleno pero non o van conseguir. Isto facíao o fascismo nos anos 30, o mesmo que vostedes aquí".

Finalmente, após a intervención de Caride, a veciñanza abandonou voluntariamente o salón de plenos, mentres o rexedor daba a palabra ao concelleiro do BNG, Xabier Pérez Igrexas, a quen lle espetou: "Lamento que os seus amigos tivesen que marchar".

O concelleiro do BNG tentou facer uso da palabra mais o rexedor impediullo ao interropelo en múltiples ocasións dicíndolle "ten un minuto para intervir". 

Pérez Igrexas apelou á calma dicíndolle que "estivese tranquilo" mais o alcalde da cidade olívica continuou a interrompelo.

A asociación Avibe, integrante da plataforma 'Vigo somos todxs' canda outros 16 colectivos, denuncia a "falta de participación cidadá e falta de escoita" por parte do Goberno municipal. "Só pedimos municipalismo democrático e valente, porque percibimos o Concello como a administración máis próxima aos veciños", trasladaron, á vez que expresaron a súa esperanza de que o Executivo de Caballero "cambie de actitude" e opte por recibilos para escoitalos "respectuosamente", motivo polo que acudiron ao pleno.

A plataforma mobilizouse o pasado 5 de decembro para denunciar que, fronte ás reclamacións, o Concello "non negocia e non atende ás críticas dos veciños", impulsando accións "unilaterais" que afectan ao día a día dos mesmos e que non son "consensuadas, consultadas ou participadas cos miles de persoas afectadas".

Comentarios