O secretario xeral do PSdeG, Gonzalo Caballero criticou de “baleiro” e “sen contido” o discurso realizado por Alberto Núñez Feixoo esta terza feira, 1 de setembro, na Cámara galega, con motivo da primeira sesión do pleno de investidura. Será na quinta feira cando chegue a quenda da oposición e máis a votación.
É "deber" do presidente ter medidas de "empurre e ilusión e ter a necesaria empatía coa cidadanía que está preocupada" ante a pandemia, sinalou Gonzalo Caballero. Porén, para o socialista, a poboación non puido atopar “respostas para estar máis tranquila e máis segura" na intervención de Feixoo.
Caballero lembrou, en relación á mesa de diálogo social que Feixoo anunciou esta terza na Cámara, que poucas horas antes do pleno o PSdeG propuxo precisamente crear unha comisión parlamentaria de recuperación económica. "Desde logo, nós coincidimos no diálogo, nos acordos", apuntou Caballero, que se comprometeu a presentar "alternativas concretas" para esta lexislatura, ante o "discurso baleiro" de Feixoo.
"Fronte á crise social e sanitaria, imos traballar desde a oposición para grandes acordos de país. Traballaremos co resto de grupos, con vontade de contribuír con propostas alternativas para unha situación mellor", sentenciou.
