Esta sexta feira, nunha rolda de prensa no propio Pazo do Hórreo, o secretario xeral saínte reivindicou en varias ocasións o seu compromiso co partido e cos valores da "esquerda" e o "galeguismo" para "confrontar coa dereita, o PP e Feixoo".
"Vou seguir remando para que o PSdeG siga avanzando pola esquerda en contraposición ás políticas conservadoras de Feixóo e o PP. É a postura que debemos ter todos os socialistas alí onde nos corresponda estar".
Di estar pendente dunha chamada de Formoso para abordar a transición
Caballero dixo estar pendente dunha chamada do seu sucesor á fronte do partido, Valentín González Formoso, para abordar "a transición" na organización e o grupo parlamentario.
Neste sentido, o portavoz na Cámara afirmou ese proceso de transición levará a cabo "de forma paritaria" entre a dirección saínte e a entrante, á vez que defendeu que as supostas presións para que deixe o seu cargo á fronte do grupo na Cámara son até o momento "rumores" e "hipóteses".
"Todos son rumores, informacións sen suxeitos. Non debo entrar a contestar rumores, hipóteses e declaracións que non teñen a ningunha persona como referente", aseverou Caballero.
O portavoz do PSdeG no Parlamento galego subliñou que a súa intención é atender o "compromiso" co partido e con "os galegos".
"Teño unha longa traxectoria no partido. Tiven que pasar por travesías no deserto en momentos moi complexos e teño todo o carácter positivo", engadiu, logo de pór o acento en que sabe "da importancia da resistencia e a resiliencia".
"En política as cousas van e veñen"
Así as cousas, aludiu a que se debe "á militancia" do PSdeG. Despois de agradecer ao 40% das bases que apoiaron a súa candidatura para revalidar o cargo nas primarias vencidas por Formoso, aseverou que a súa intención é "cumprir" cos "compromisos" e "seguir traballando" para un proxecto socialista "de esquerdas, galeguista, ecoloxista e feminista".
"En política as cousas van e veñen. E a traxectoria e o compromiso político é unha referencia que sempre tiven na miña vida", resolveu.
