Novo capítulo da crise interna que sofre Podemos no país. Unha ducia de secretarios xerais de distintas localidades organízanse nunha plataforma, denominada Democracia Podemos, e advirten de que Breogán Rioboo non pode ser revogado máis que pola asemblea cidadá.
Este colectivo, integrado, segundo La Voz de Galicia, por responsábeis locais de Arzúa, Neda, Valdoviño, Viveiro, O Saviñao, Ribeira, Cerceda, Arteixo, Verín, O Carballiño, Ames e Marín, entre outras persoas, denuncian que as eleccións non cumpren os estatutos de Podemos e apelan á Comisión de Garantías estatal a se pronunciaren. Así, ameazan con pedir a invalidación da convocatoria electoral.
Democracia Podemos sinala que Breogán Rioboo –cualificado desde Madrid como secretario xeral sen atribucións- nin dimitiu nin incumpriu ningún dos principios organizativos da formación.
A comisión xestora que se encarga a día de hoxe de Podemos na Galiza anunciou esta sexta feira que o proceso electoral interno dará comezo o 15 de marzo e que os resultados se coñecerán o 12 de abril.