BNG ve indicios de prevaricación na longa tramitación da lei sobre a estafa das preferentes

A proposición de lei foi foi aprobada o 11 de marzo de 2014 no Parlamento galego e demorou 900 días en ser enviada para o seu debate ao Congreso dos Deputados, denuncia Ana Pontón.

BNG REUNION PREFERENTISTAS1

Esta é unha lei votada polo Parlamento galego para a súa tramitación no Congreso dos Deputados, sendo que toca un asunto que é competencia estatal (tal como a recente iniciativa para a transferencia da AP9, bloqueada neste momento polo veto do Goberno de Rajoy).

A demora na tramitación deste texto legal, a ollos do BNG, é moi sospeitosa e por iso o grupo parlamentar nacionalista rexistou un escrito dirixido á Mesa do Parlamento para investigar por vía de urxencia as razóns que explican por que a lei a favor da devolución dos aforros estafados pola banca através das preferentes e subordinadas tardou 32 meses en ser remitida ao Parlamento.

A portavoz nacional do BNG, Ana Pontón, anunciou esta petición de investigación após manter un encontro con representantes das plataformas de persoas atinxidas pola estafa. Con elas non só analisou a demora da tramitación por parte do Parlamento galego, senón o veto interposto polo goberno Rajoy para impedir que agora, unha vez que chegou ao Congreso dos Deputados, poda ser tomada en consideración na cámara estatal.

ReuniónBNGPreferentesO veto foi cualificado de “vergoñento” por Pontón, quen salientou que é “o segundo en apenas tres meses a unha lei galega”, un feito que poría de manifesto a “irrelevancia política de Feijóo”.

Sobre a demora na tramitación da lei no Pazo do Hórreo, Pontón falou abertamente de “secuestro” da iniciativa. “Este secuestro é antidemocrático, ilegal e mesmo podería ser constitutivo dun delito de prevaricación”, dixo e deu un dado abondo esclarecedor: “A lei a favor da transferencia da AP9 foi notificada ao Congreso o mesmo día da súa aprobación no Parlamento galego, mais esta lei para acabar coa estafa das preferentes tardou 900 días en ser enviada”, denunciou a líder nacionalista.

As demandas das persoas atinxidas pola estafa das preferentes están moi lonxe de teren sido inteiramente satisfeitas e nese sentido Xesús Domínguez, da Plataforma de Afectados de Compostela, manexa o dado de que na Galiza aínda hai 10.000 vítimas do calote que reclaman a devolución de 100 millóns de euros atrapados nestes produtos financeiros opacos.

Pontón criticou o Goberno Rajoy por lle virar as costas ás vítimas das preferentes e por se gabar, no escrito que o Ministerio de Economía enviou á Mesa do Congreso para xustificar o veto, de lle ter aforrado ao FROB 13.640 millóns de euros nas devolucións ás persoas estafadas.

“Dúas veces estafados, pola banca e polo Goberno de Rajoy”, recapitulou Pontón.

As fotografías son do BNG (a da parte superior) e de Natalia Porca.

Comentarios