Debe pagar o IBI a Igrexa católica polos imóbeis dos que é titular? A cidadanía debería tomar a palabra e decidir cuestións deste teor, a xuízo do BNG. A organización frentista organizou esta terza feira, en Santiago de Compostela, unha consulta simbólica popular sobre esta cuestión, face a hospedaria de San Martiño Pinario.
“Ten que mandar a cidadanía, a orden ten que vir de abaixo arriba e non ao revés. Hai que romper esa cadea de mando vertical que converte os concellos en estruturas ao servizo do poder central e dos poderes económicos. Iso garántase con máis transparencia, participación cidadá e con máis protagonismo no proceso de toma de decisións”, dixo aos meios o portavoz nacional do BNG, Xavier Vence.
Para Vence, nas municipais confrontan dous modelos antitéticos. O do PP, obsesionado por conquistar maiorías absolutas para impor o que cualifica de políticas antisociais. E o do BNG, que claramente aposta na participación do pobo na toma de decisións dos concellos.
Cela estimou en 200.000 euros anuais os que o concello deixa de receber o ano ao estar a Igrexa exenta do pagamento do IBI
“Feijóo clama por ter maiorías absolutas precisamente para impoñer decisións verticais de arriba abaixo e garantir que os concellos do PP sexan absolutamente obedientes”, advertía Vence. Obedientes aos poderes económicos e obedientes a Madrid.
Vence e alcaldábeis
Non só votou Vence na consulta simbólica: tamén emitiron o seu sufraxio os alcaldábeis nacionalistas por Santiago, Rubén Cela; Vigo, Serafín Otero; Lugo, Rubén Arroxo; e Ourense, Susana García, canda militantes e simpatizantes da formación nacionalista.
O referendo era simbólico, mais de se levar á práctica tería consecuencias nada desprezábeis para as arcas municipais. Rubén Cela estimou en 200.000 euros anuais os que o concello deixa de receber o ano ao estar a Igrexa exenta do pagamento do IBI.
Aliás, Cela esclareceu cales son os contidos da proposta do BNG. O Bloque quer que a Igrexa pague o IBI por aquelas propriedades das que é titular e que non son empregues para o culto ou carecen de función social. “Non pedimos que a Catedral nin os bens de culto paguen o IBI, nin os colexios, nin a Cociña Económica nin o Albergue; reclamamos que as leiras, prazas de garaxe, pisos, establecementos hostaleiros [que son da Igrexa] paguen os impostos que lles corresponden”, acrecentou.
