Ana Pontón, portavoz nacional do BNG, compareceu ante os medios esta sexta feira para mostrar a disconformidade do Bloque coas políticas en materia de pensións do Partido Popular que, segundo a voceira, “poñen en risco o estado de benestar e as pensións do futuro e o presente”. Pontón reclamou a creación dunha comisión de expertos que analice “as causas do modelo de emprego de Rajoy e propoña medidas correctoras para o sistema de pensións”, ao fío da última sustracción de 8.700 millóns de euros aos fondos reserva, coñecida esta semana.
“O 31% dos traballadores galegos cobran menos do salario mínimo interprofesional e isto traerá consecuencias nas pensións do futuro”
A última retirada de efectivos fai que a cifra ascenda a 56.000 millóns de euros retirados polo goberno de Rajoy desde 2012. A Seguridade Social precisou a última quita para efectuar o pago das pensións e da paga extra de xullo e deixando as arcas en 25.176 millóns de euros. “Se seguimos a este ritmo, en 2018 o fondo estaría a 0”, valorou Ana Pontón, aludindo o modelo do sistema de emprego do Partido Popular como principal culpábel: “O 31% dos traballadores galegos cobran menos do salario mínimo interprofesional e isto traerá consecuencias nas pensións do futuro”.
Para a formación desta comisión, Pontón remítese ao Parlamento de Galiza como o lugar indicado para debater a creación desta comisión que “integrará axentes sociais e no que deberían estar presentes todos os grupos parlamentarios”, o cal retrasaría a súa formación, probabelmente, até despois das eleccións galegas.