Unha proposición non de lei (PNL) do BNG pide á Xunta a paralización de todos os expedientes de despexo en trámite en Galiza. A proposta, que incorpora unha emenda de AGE, achegaba unha serie de medidas e actuacións a desenvolver para, sinalou o deputado Cosme Pombo, parar coa “lacra” dos desafiuzamentos. “Máis de 10.000 persoas perderon a vivenda no noso país”, dixo o parlamentar, que enmarcou esta realidade nun escenario no que Galiza “ten 630.000 persoas en risco de estar no limiar da pobreza” e é o segundo territorio do Estado en número de persoas a vivir na rúa.
As administracións, nomeadamente a galega, non poden ficar de brazos cruzados perante isto, manifestou Pombo, que lembrou que promesas feiras desde a Xunta, como a de habilitar 500 vivendas para acoller familias que as precisasen ficaron en nada. “Ocupáronse só 43”.
A PNL do BNG pedía á Xunta que exercese as súas competencias en vivenda para garantir ese dereito. E catro puntos máis: solicitar do Goberno do Estado a paralización de todos os procedementos de execución hipotecaria en curso, reclamar das entidades financeiras a procura de solucións negociadas e compartidas coas familias que teñen problemas para afrontar a hipoteca, reclamar das entidades financeiras que operan na Galiza, a devolución do cobrado ilexitimamente, en concepto de cláusulas solo abusivas, ás familias hipotecadas. E, por último, pedir ás entidades financeiras “unha quita no importe das hipotecas, que teña en conta a responsabilidade das entidades financeiras na sobrevaloración das vivendas no período da burbulla inmobiliaria, e as axudas públicas que recibiron para sanealas para buscar solucións negociadas e compartir os problemas das hipotecas abusivas entre as dúas partes afectadas”.
A PNL incorporou a emenda de AGE, que propón “a creación dun parque público de alugueiro social e a dotación de medios suficientes para garantir que en todas as cidades e vilas existan suficientes vivendas para o realoxo de familias desafiuzadas”. O deputado Antón Sánchez apelou os gobernos a “asumir” o fracaso das súas políticas neste eido, e enmarcou os despexos nun panorama preocupante de desiguladade social, “onde hai xente que traballa mais que o salario non dá para facer fronte a un alugueiro”.
Porque, e iso tamén o destacou o PSdeG por boca de Sánchez Bugallo, máis da metade dos desafiuzamentos proceden de familias que non poden pagar esa renda de aluguer, e non por hipotecas.
Mais desde o PP defenderon que tanto goberno galego como español aprobaron medidas contra os despexos e en política de vivenda.
