O Bloque arrinca as asembleas abertas nas cidades cun cheo en Compostela

Centos de persoas participaron na asemblea aberta convocada polo BNG en Compostela no marco do proceso 'Construíndo futuro'.

Asemblea Compostela
photo_camera Asemblea Compostela

Perto de 200 persoas ateigaron na quinta feira (18 de setembro) a Aula 4 da Facultade de Filosofía. A asemblea aberta convocada pola comarca do BNG de Compostela xuntou numerosas voces para debater sobre o actual estado de cousas, as mudanzas que se están a producir no terreo político, electoral, económico e social mais tamén, arredor dos cambios que han de producirse no seo das organizacións políticas para recuperar a credibilidade e o apoio social. 

Por volta das 20.15 horas e cun bocadiño de retraso comezaba a asemblea aberta. Riba da mesa non había orde do día ou un plan de traballo senón, a vontade de partillar ideas, confrontar pareceres e escoitar a todas aquelas persoas que quixesen achegar a súa perspectiva a respeito dos cambios que se están a producir. 

Moitas foron as voces que se ergueron para valorar o traballo desenvolvido polo BNG ao longo dos últimos anos, mais tamén, outras tantas para retrucarlle á organización frontista non ter sido capaz de abranguer e canalizar o descontento social xerado após o estourido da crise económica. Algunhas das intervencións reclamaron mudanzas no seo da fronte nacionalista e unha maior "escoita activa" e "participativa" que rache coa rixidez que, sob o seu ponto de vista, foron adoptando as súas estruturas ao longo dos seus 34 anos de existencia. 

Algunhas das intervencións reclamaron mudanzas no seo da fronte nacionalista e unha maior "escoita activa"

A crítica construtiva mesturouse co recoñecemento pola convocatoria do proceso 'Construíndo futuro' que o BNG lanzou co obxectivo de pór en común coa cidadanía as análises e diagnoses da actual situación política. Un feito que estivo marcado pola inminencia das eleccións municipais e o xurdimento de novas propostas electorais como as denominadas Mareas. 

Algunhas das persoas que tomaron a palabra propuxeron ao Bloque sumarse a estes proxectos mais do intercambio de opinións saíu reforzada a aposta na concorrencia dunha candidatura nacionalista á que @s asistentes chamaron a se sumar a todas aquelas persoas e forzas políticas que teñan no cerne da súa acción política afortalar e reforzar o proxecto nacionalista. 

No seo do debate, unha idea que percorreu a sala, "este é un punto de partida, non o final". Unha idea que reflicte a vontade d@s nacionalistas por dar continuidade a estes encontros abertos cos que recompilar opinións diversas --dentro e fóra da súa militancia-- para encarar o futuro máis inmediato, mais tamén, a longo prazo. 

Comentarios