O portavoz nacional de Anova está “convencido” de que a demisión esta segunda feira, despois do referendo sobre candidaturas a Europa, de 10 membros da Comisión Permanente é “un erro”. Mais, asegurou, Anova “non está en perigo de desaparición”.
Xosé Manuel Beiras defendeu o seu posicionamento público a prol de concorrer ás europeas con IU. Afirmou que non facer iso sería unha “irresponsabilidade” e mesmo unha “auto-censura”.
O resultado do referendo (cun 48% a prol de ir con IU e un 46,6% a prol dunha candidatura soberanista de esquerdas e/ou plataformas cidadás) é de “empate técnico”, recoñece Beiras. Por iso, apuntou, faise mester atinxir “consensos” mais sen que isto implique, engadiu, cambiar o resultado do expresado pola militancia de Anova nas urnas.
IU e Podemos
Mesmo suxeriu Beiras que podía haber un punto en común entre as dúas posturas, sinalando as novas de que había un principio de acordo entre IU e Podemos e que respostaría a esa aposta por sumar aos movementos sociais.