O grupo de militantes que lidera Carlos Aymerich elixirá órganos de dirección e aprobará os documentos políticos que o rexerán nunha asemblea convocada en Compostela para o próximo día 9 de xuño. Entre os militantes nacionalistas que forman parte da xestora atópanse, para alén do propio Aymerich, a deputada Ana Luisa Bouza, o deputado provincial de Ourense Luis Seara e os rexedores de Tomiño e Bueu, Sandra González e Félix Juncal. Participan tamén do proxecto outros membros do Consello Nacional como Camilo Nogueira, María Alonso e Xesús Veiga ademais de Dominga Brión e Manuel Monge, ex-concelleiros de Ribeira e A Coruña.
Carlos Aymerich apunta ao respecto da próxima convocatoria que se trata de formalizar o que se anunciara na creación da xestora en abril. "Organizarnos para traballar dentro do BNG. Decidiremos o nome e aprobaremos os relatorios políticos e organizativos" afirma. En todo caso, anuncia tamén que ao respecto da liña política do colectivo, non diferirá da que defendeu na pasada Asemblea Nacional do BNG. "Traballar unitariamente no nacionalismo, como esquerda transformadora e democrática no ámbito político e económico" fronte a que define como "as ditaduras dos mercados".
Por medio dun comunicado, sinalan que a xuntanza constituínte estará aberta “a cantos militantes do BNG queiran compartir a idea dun nacionalismo de esquerda democrática e cunha clara vocación unitaria”. A xestora da que sairá o novo colectivo está composta por militantes do BNG que abandonaron Máis Galiza despois de que o pasado mes de marzo a formación decidira deixar de formar parte da fronte nacionalista.