Segundo puido saber este medio, a Executiva nacional do BNG vén de valorar como posíbel data para a convocatoria da Asemblea Nacional a fin de semana do 16 de Marzo. Após os malos resultados electorais recollidos o pasado 21 de outubro, a organización frontista áchase en pleno proceso de debate interno visando a introdución das mudanzas necesarias para recuperar os seus apoios e encarar esta nova etapa.
Amais dos debates comarcais, @s nacionalistas iniciaron asembleas abertas en que simpatizantes da organización achegaron as súas propostas a respecto dos cambios precisos en termos organizativos, mais tamén políticos ou comunicativos. Neste senso, o BNG procurou recoller o maior número de opinións que pasarán a tomar parte do documento a debate na Asemblea nacional.
Entre as incógnitas que marcarán a xuntanza, que será de participación aberta a toda a militancia, atópase o nome da persoa que ocupará a portavocía nacional da organización frontista logo de anunciar Guillerme Vázquez a súa vontade de non concorrer á reelección do cargo que ocupa desde Maio de 2009.