Para Anova, Grecia é o “primeiro escenario da batalla” que “tras decadas de apropiación polo neoliberalismo do termo Democracia” enfrenta o “capital” coas “maiorías populares do sur europeo”, das que Galiza, subliña, fai parte.
A organización integrada en AGE cualifica de “pura chantaxe mafiosa” o facto de o Fundo Monetario Internacional ter decidido FMI suspender “as axudas a Grecia” até a “celebración das eleccións anticipadas”.
“Dende Anova queremos mostrar a nosa solidariedade co pobo grego e expresarlle o noso apoio para que exerza en liberdade –na liberdade dos non aferrollados pola dependencia económica– a súa soberanía”, lese no comunicado de imprensa da formación liderada por Beiras.
Anova preanuncia un “bombardeo mediático” nas próximas semanas visando amedrontar o pobo grego e co obxectivo de prexudicar as espectativas eleitorais de Syriza, actualmente ao fronte de todas as enquisas coñecidas.
