A delegación de Anova estará encabezada por Xosé Manuel Beiras, portavoz nacional, e dela fan parte Antón Sánchez, coordenador nacional; Esther Duro, secretaria de Organización; Raúl Asegurado, secretario de Relacións Políticas; e Alexandra Fernández, deputada eleita e portavoz de En Marea no Congreso.
"Manteremos unha reunión por volta das 16 horas cos distintos axentes das confluencias [Podemos, En Comú Podem, Compromís...] e logo están previstos tamén contactos bilaterais coas direccións de Izquierda Unida federal e con Podemos", informou a Sermos o secretario de Comunicación de Anova, Manoel Santos.
Antes de realizar calquera análise "colectiva" dos resultados do 26X e de deseñar a folla de rota encamiñada xa ás próximas eleccións galegas -que mesmo se poderían convocar a finais do próximo mes de setembro-, a intención de Anova é trocar impresións cos seus socios, daí este desprazamento a Madrid.
A coordenadora nacional de Anova -máximo órgao entre asembleas- tiña previsto realizar unha reunión este sábado, mais fica aprazada para o seguinte, "dado que este venres vamos ter boa parte da nosa dirección en Madrid". "Consideramos importante ter máis información e contrastar pontos de vista cos axentes da confluencia antes de reunir o noso máximo órgao de decisión", di Santos.
