As sondaxes non deixan en bo lugar a Rueda. Malia acadar maior presenza pública desde o seu nomeamento como presidente da Xunta da Galiza, o seu nivel de coñecemento segue a ser moi baixo.
As enquisas sinalan, tamén, unha caída da súa valoración. A mesma, prodúcese nun momento relativamente bo para o partido no Estado e cando os traballos demoscópicos apuntan a unha alza da formación.
O anticandidato
A imaxe que trasladan de Rueda as sondaxes é a do anticandidato. Neste sentido, significan a súa distancia, a súa falla de proximidade e a súa capacidade de empatizar cos problemas de poboación.
Os populares néganse a cargarlle a Rueda a responsabilidade sobre as súas perspectivas electorais de cara ás eleccións galegas, porén as expectativas non son boas. Neste sentido, os conservadores fican cada vez máis lonxe da maioría absoluta e sitúan BNG, PSdeG e Unidas Podemos con capacidade para conformar un Goberno alternativo ao PP.
O vídeo de Nadal dos populares galegos é a expresión da debilidade do seu candidato. A presentación de Rueda como un motorista cuberto cun casco, que fai quilómetros e quilómetros, mais descoñecido para o porteiro da sede da Xunta da Galiza é todo un símbolo.
Un vídeo para mobilizar a militancia
A peza audiovisual non está pensada para a cidadanía galega senón para a militancia dunha formación que se ve sen líder. Neste sentido, a dirección do partido tenta trasladarlle a afiliación que con traballo é posíbel acadar calquera obxectivo.
A presenza na montaxe dos presidentes provinciais do partido e da súa secretaria xeral na Galiza afonda na idea de falla de tirón de Rueda. Así, preténdese mandar ás bases da organización a idea da importancia dos equipos fronte aos liderados.
A preocupación e o malestar con Rueda percíbese nos cadros populares. A maioría deles consideran que non foi unha boa elección e, sobre todo, que a súa candidatura non ten marxe de mellora pola imaxe que está asentando entre a sociedade.
Os comicios galegos e estatais
As eleccións locais serán a primeira proba de Rueda e dela vai depender a táctica dos populares para as galegas. Aínda que ninguén no PP galego quere pensar nuns malos resultados e agardan superar a porcentaxe de votos dos comicios de 2019, todos coinciden en que Rueda está diante da súa primeira proba de lume.
Os populares saben que non hai alternativa diferente a Rueda para liderar a formación nos vindeiros comicios galegos porén buscan paliar a súa falla de tirón electoral. Neste sentido, estudan facer coincidir as eleccións galegas coas estatais de fin de ano ou mesmo coas europeas.
A primeira opción gaña forza, co obxectivo de aproveitar que Feixoo é o candidato do PP ás estatais. Ao tempo, na cociña do PP consideran que esta opción tamén contaría co apoio dos socialistas galegos.
