En Marea admitiu por boca dos seus candidatos e candidatas que os resultados das eleccións xerais non eran os esperados. “Supoñen unha mala nova para o cambio político no Estado español”, sinalou Antón Gómez Reino (Podemos), número 1 pola Coruña. Tamén Alexandra Fernández (Anova), número 1 por Pontevedra, recoñeceu que En Marea non agardaba eses resultados, após perder o escano de Ourense e baixar en número de apoios.
Malia a queda, En Marea tratou de lanzar unha mensaxe de optimismo, “a loita é longa e seguiremos a traballar no cambio político tamén a nivel do Estado”, afirmou Alexandra Fernández, quen chamou a “seguir pulando por que este proceso camiñe con vistas ao futuro”. Na mesma liña, Gómez Reino apelou ao “compromiso do traballo e do día a día, nese espazo das mareas que irá pouco a pouco indo máis alá”.
Tamén compareceu diante dos medios Yolanda Díaz (IU), quen asegurou que hai “unha marea viva que rexurde e temos a experiencia dabondo para desde mañá comezar a traballar polo futuro, empezar unha nova andaina no noso país”.
Rajoy: “Reclamamos o dereito de gobernar para todos os españois”
Mariano Rajoy foi o último dos líderes políticos en comparecer diante da imprensa. Na súa intervención anunciou que esta segunda feira encetará as conversas para formar goberno. “Reclamamos o dereito a gobernar para todos os españois, para quen nos votaron e para quen non”, salientou. “Gañastes as eleccións porque tivestes fe na vitoria. Teño que darlle as grazas a todos. Foi duro e difícil mais demos a batalla, sen poñernos ás ordes de ninguén, por España e polos intereses dos españois”.
Sánchez: “O PSOE é o partido hexemónico da esquerda”
Na súa comparecencia diante da imprensa, Pedro Sánchez, líder do PSOE, asegurou non estar satisfeito, “queriamos gañar estas eleccións e non o conseguimos, pero, con todo, somos a primeira forza política da esquerda”. “Malia as dificultades extraordinarias e as expectativas, o PSOE volveu confirmar a condición de partido hexemónico da esquerda”, engadiu.
Pablo Iglesias: “Non estamos en ningún caso satisfeitos cos resultados”
Unha das intervencións máis esperadas da noite era a de Pablo Iglesias, quen compareceu, xunto con dirixentes de Podemos como Errejón –cun rostro de enfado- ou de IU como Alberto Garzón. Iglesias admitiu que “non estamos en ningún caso satisfeitos cos resultados”. Tratou de quitarlle ferro ás cifras, afirmou que “a madurez en política ten a ver con xestionar os momentos doces e os menos doces” e negou que Podemos teña teito.
Albert Rivera: “Se se poñen as cadeiras por diante, Ciudadanos estará na oposición”
O candidato de Ciudadanos, Albert Rivera, compareceu para convidar o PSOE e PP a sentar para formar goberno. Dixo ter “só unha condición”: non poñer as cadeiras por diante. “Se é así, Ciudadanos estará na oposición”. Rivera salientou os resultados obtidos, “máis de tres millóns de españois dixeron que queren centro, que queren un cambio a mellor e que non queren corrupción”.