domingo 05.07.2020
Maiorías

Nove alcaldes gañan con absolutas superiores ao 80%

O 26M deixa nove municipios galegos onde a forza gañadora alcanzou maiorías absolutas que superan o 80% dos votos. Delas, 6 son para o PP (Beariz, Esgos, Quintela, Vilarmaior, Sarreaus e Friol), 2 para o PSdeG (Dumbría e Ourol) e outra para Xuntos (Vilar de Santos).

Concello de Vilar de Santos
Concello de Vilar de Santos

En nove municipios da Galiza álzanse as alcaldías colleitando cotas absolutas de apoio que superan o 80% dos votos emitidos. A veciñanza votou case por unanimidade nestas localidades dando o bastón de mando ao PP en Beariz, Esgos, Quintela, Vilarmaior, Sarreaus e Friol. As alcaldías do PSdeG con máis do 80% dos sufraxios nas urnas son en Dumbría e Ourol, mentres que Xuntos (En Marea) gaña en Vilar de Santos copando todas as actas do consistorio.

O PP gaña 6 alcaldías con máis do 80% dos votos

En Beariz o PP segue na alcaldía con Manuel Prado. A pesar de baixar en votos, consegue o 482 votos (89,42%) e todos os 7 asentos cos que conta o pleno municipal, arrebatando así a única acta que obtivera SON (mareas) en 2015.

No concello natal de Xose Luís Baltar, Esgos, o PP arrasa con 640 votos (80,50%), obtendo 6 actas mentres que o PSdeG mantén o seu edil co 18,74% dos sufraxios. Así as cousas, o alcalde será Mario Rodríguez.

En Quintela de Leirado José Antonio Pérez fai pleno no consistorio e logra os 7 asentos en xogo para o PP, desaparecendo así o único que tiña o PSdeG. Baixa en votos o PP, logrando 385 fronte os 51 do PSOE, mais a formación conservadora sobe en porcentaxe (88,10%).

En Sarreaus o PP leva 8 actas con 701 votos (82,96%) para o alcalde Gumersindo Lamas, mentres que o PSdeG fica con 1 acta e 133 votos (15,74%).

En Vilarmaior só concorreu o PP e ocupa por tanto todas as actas obtendo os 9 asentos do consistorio con 628 sufraxios (87,59%). Desaparece así o BNG que en 2015 gañara unha acta e que desta vez non presentou candidatura.

En Friol o PP quita dúas actas ao PSdeG e segue na alcaldía pasando de 8 a 10 edís e sobe do 64,21% nos anteriores comicios ao 81,27% actual. O PSdeG cae das 3 actas e retén unha soa.

Os alcaldes absolutos do PSdeG: Dumbría e Ourol

En Dumbría Xosé Manuel Pequeno estará na alcaldía pese ao seu partido, o PSdeG retroceder unha acta. Continúa aínda así folgado na súa maioría absoluta con 9 concellarías e os 1.526 votos (80,83%). O PP sobe e pasa de ter un único edil a contar con 2 e 340 votos (18%).

En Ourol os resultados respecto das anteriores municipais mudaron salientabelmente. O PSdeG dá o salto pasando das 4 actas ás 8 con Xosé Luís Panxón á cabeza, cunha maioría absoluta de 633 votos (81,78%), deixando o PP relegado a un só edil (en 2015 o PP tiña 3 actas e Compromiso por Galicia 2).

Xardón gaña todas as actas a pesar das siglas polas que se presente

En Vilar de Santos o alcalde Xoan Xosé Jardón leva varios procesos mantendo a totalidade das actas baixo diferentes siglas (BNG primeiro e logo Compromiso por Galicia). Agora revalida a totalidade das actas coa candidatura Xuntos Vilar de Santos (dentro do espazo político de En Marea) con 490 votos (64,19%), 66 votos PP (11,34%) e 22 votos PSOE (3,78%).

comentarios